མཁན་ཟུར་ཤེས་རབ་མཐར་ཕྱིན་རིན་པོ་ཆེའི་ཞབས་བརྟན་གསོལ་འདེབས།

མདོ་སྨད་གཡུང་དྲུང་བོན་གྱི་འདུས་སྡེ་ཆེན་མོ་༧དཔལ་གཤེན་བསྟན་དགའ་མལ་དགོན་ཆེན་གྱི་མཁན་རབས་དང་པོ་༧མཁན་ཆེན་ཤེས་རབ་ཚུལ་ཁྲིམས་མཐར་ཕྱིན་རིན་པོ་ཆེའི་ཞབས་བརྟན་གསོལ་འདེབས།
བོན་བརྒྱ་དགེ་ལེགས་ལྷུན་གྲུབ་རྒྱ་མཚོས་བརྩམས།
5JDOJPLD.jpg

 ཨེ་མ་ཧོ། བདེན་གཉི༷ས་ཟུང་འབྲེལ་རྒྱད་ཁྲི་བཞི་སྟོང་བོན། །
ཤེས༵་ར༵བ་གསུ༷མ་ལྡན་སྤྱན་གྱིས་རྣམ་པར་འབྱེད། །
བདེན་བཞི༷་ལམ་གྱི་བགྲོད་པ་མཐ༵ར་ཕྱི༵ན་ནས། །
སྐུ་ལྔ༷འི་རྒྱལ་སར་དབང་ལ་གསོལ་བ་འདེབས། །
ཤེས༵་ར༵བ་ཉི་མའི་འོད་སྣང་ཕྱོགས་མེད་གསལ། །
ཤེས་བྱ་པདྨའི་དགའ་ཚལ་རྣམ་པར་བཞད། །
ཤེས་དང་ཤེས་བྱ་དབྱེར་མེད་མཐ༵ར་ཕྱི༵ན་ནས། །
ཤེས་ལྡན་ཡོངས་ཀྱི་མགོན་མཛད་གསོལ་བ་འདེབས། །
ཤེས༵་བྱའི་སྣང་བརྙན་བཀྲ་གསལ་དཀྱིལ་འཁོར་འབུམ། །
ར༵བ་ཡངས་མཁྱེན་པའི་མེ་ལོང་གཅིག་ལ་རྫོགས། །
མཐ༵ར་འཛིན་གཉིས་སྣང་དྲི་མ་ཀུན་བསལ་ནས། །
ཕྱི༵ན་དྲུག་བསྡུ་བཞི་མཛད་ལ་གསོལ་བ་འདེབས། །
བསླུ་མེད་མཆོག་གསུམ་སྲུང་མའི་ཐུགས་རྗེ་དང་། །
འགྱུར་མེད་ལྷག་བསམ་དག་པའི་རྟེན་འབྲེལ་གྱིས། །
འཇིག་མེད་གདོང་ལྔའི་ཁྲི་ལ་བསྐལ་བརྒྱའི་བར། །
གཡོ་མེད་རྟག་བརྟན་འགྲོ་རྣམས་འདྲེན་པར་ཤོག།

ཅེས་པའང་རིན་སྤུངས་ཚུལ་བསྟན་ནས་བསྐུལ་ངོར་བོན་བརྒྱ་སྐྱེ་མིང་བ་ངག་དབང་དབྱངས་ལྡན་དགྱེས་པའི་བློ་གྲོས་ནས་ཐོལ་ཤར་དུ་ཕུལ་བའོ། །